Bandora Roj TV ya li ser qenalên din ên bi kurdî

Zekî Ozmen

Çawa niha li Tirkiyeyê teknîsyenên televîzyonan û pêşkêşvanên herî bi nav û deng ji TRT´ê rabûne û di qenalên taybet de cihekî taybet digirin, bandora kesên ku berê di Roj TV de xebitîne û dûre di televizyonên din ên kurdî de kar dikin jî berbiçav e...

Mirov di piraniya televîzyonên kurdî yên niha weşanê dikin de pêrgî kesên ku berê di Med TV û qenalên din yên berdewamiya wê de wekî teknîsyen û pêşkêşvan xebitîne tê.

Ne tenê TRT û Med TV, li piraniya welatan rewş wekî hev e. Li Almanya jî pêşkêşvanên qenalên taybet ên herî bi nav û deng ava qenalên dewletê yên mîna ARD û ZDF´ê vexwarine.

Ez texmîn dikim li piraniya welatên cîhanê rewş wisa ye û tv´yên dûre vebûyî di bin bandora tv´yên yekemîn ku hatine vekirin de mane.

Di halê hazir de 9 qenalên kurdî li ser satelîtê (peykê) weşana xwe dikin û tê gotin ku di nava demeke kurt de du qenalên din jî wê lê zêde bibin.

Ji hêla hemû derdoran ve tê qebûl kirin ku Roj TV televîzyona kurdî ya ji hêla weşangeriyê ve ya herî bi qalîte ye. Profîla pêşkêşvanan, rêkûpêkbûna herikandina bernameyan, kalîteya deng, ronahî û hemû cureyên teknîkî yên Roj TV, wê, ji qenalên din yên kurdî cihe dike.

Digel ku mirov di piraniya qenalan de pêrgî kesên berê di Med TV, Medya TV û Roj TV kar kirine tê, hejmara bilind a kesên berê di hersê tv´yên berdewamiya hev in karkirine û niha di Tishk TV de kar dikin berbiçav e.

Bi baweriya min sedema bingehîn ev yek e ku kalîteya Tishk TV – digel ku dema wê ya weşanê kêm e jî- ji hêla teknîkî ve ji qenalên din bi rêkûpêktir xuya dike.

Sedemên kalîteya baş a Roj TV

Dema carekî ez bi hevalekê pêşkêşvanê televizyonekê re li ser kalîteya tv´yên kurdî axivîm, wî tespîteke wisa kir: “Sedema bingehîn yên pêşveneçûna kalîteya hinek qenalên kurdî ew e ku mentalîteya ‘bila tv’yek me jî hebe, xema kalîteyê nake` ye.”

Bi baweriya min sedemê bingehîn yê kalîteya baş a Roj TV ew e ku wê herdem reqabeta weşangeriyê ber bi çavan girt. Her çiqas tv´yên kurdî ji ber sedemên diyar ji bo reklamstandinê teşwîqî reqabetê neyin kirin jî, Roj TV herdem di nava şerê reqabetê de ye.

Mirov di piraniya malên kurdên bakurî de dibîne ku berê satelîta wan li ser Turksatê de ye û gelek mal jî hene ku bi du sêlikan hem Hotbîrdê û hem jî Turksatê îdare dikin. Hem jî digel wê li ser satelîta ku Roj TV weşana xwe dike, heşt qenalên din yên kurdî jî hene. Ev tê wê wateyê ku Roj TV hewl dide ku ne reqabetê tenê digel tv´ên din ên bi kurdî re dike, ew her wiha reqabetê digel qenalên bi tirkî jî dike.

Gelo wekî encam mirov dikare bibêje ku kalîte girêdayî wê yekê ye ku dema weşan ji nav welêt an li derveyî welêt tê kirin e?

Li gor xuya dike, belkî di warê dewlemendiya dîmenan de bandorek wisa hebe lê belê hem tv´yên li welêt û hem jî yên li derveyî welêt ev îdîa heta niha pûç kirine.

Bi hêviya ku êdî armanc ne “bila televizyonek me jî hebe, xema kalîteyê nake” be lê belê armanc ev be: “ger qenaleke me hebe, bila bi kalîte be”, ji ber êdî pirbûna qenalên kurdî dibe sedem ku temaşevan çav li kalîteyê bigerînin
2006
***